Vandaag, zónjig 17 jannewari, haet ósze gooje vrundj, kammeraod en besjtuurslid van de Stichting Knooppunt Het Vonderen, Bert Heeskens, ós verlaote. Hae woor nog lang neet klaor op deze waereld, mer ’n versjrikkelikke ziekte haet ‘m oeteindelik gein kans gegaeve. Hae is noe begoos aan zien lètste reis.
Bert woor ein van de drievende krachte in ’t tiem van KPHV. Neet allein woor d’r bienao waekeliks, aafgewisseld mit Rob, te heuëre op de radio in de rubriek ‘de Bak van Bakkes’, mer oug bie KPHV-Laif woor hae d’r altied bie: tiejes de maondelikse oetzendinge, mer oug bie de marathonoetzending op Koppelpop. ’t Maakte neet oet wat ze ‘m vroogs. Bert dee ‘t. Hae genoot zichbaar van ’t enthousiasme die de muzikante, kiekers, loesteraers en anger tiemlede hawwe bie ’t maake van de programma’s. Hae verheugde zich op de opnames en keek oet nao ’t moment det we weer laif zoewe kènne en mooge gaon. Helaas doerde de lockdown oug veur häöm te lang.
Neet allein bie ós haet Bert de lach op väöl gezichte gekrege en zich ingezat es vriewilliger. We kènne ‘m oug es Sinterklaos, es Kerstman, in de vastelaovesoptoch, zien vriewilligerswerk bie versjillende stichtingen en verenigingen. Nemes dee vergaefs ’n beroep op ’n helpende handj van Bert én zien Marina.
Bert: weer gaon dich misse en haope det ‘dien bèste jaore’ örges angesj ’n nog baeter vervolg moge kriege.
Weer wunsje Marina; Naïlja; Jim, Simone en Mees; Niels; femilie en vrunj hieël väöl wijsheid en krach toe.
Rob, Frits, Miranda, Stan, Wim en René.